༄༅།།ལེགས་པར་བཤད་པ་ཆུའི་བསྟན་བཅོས་ལུགས་གཉིས་རླབས་ཕྲེང་
བརྒྱ་ལྡན་ཞེས་བྱ་བ་བཞུགས་སོ།།
འཇིག་རྟེན་ལུགས་ཀྱི་སརྒ།
༄༅།།མཁྱེན་པའི་གཏིང་མཐའ་མི་མངོན་ཞིང༌། །ཐུགས་རྗེའི་ཡིད་བཞིན་ནོར་གྱིས་གཏམས། །མཛད་པའི་རླབས་ཕྲེང་གཡོ་བ་ཅན། །ཐུབ་དབང་ཆོས་ཀྱི་རྒྱ་མཚོ་རྒྱལ། །རྙོག་བྲལ་དྭངས་པའི་ཆུ་རྒྱུན་གྱིས། །ལུས་ཅན་གདུང་བ་ཞི་བྱེད་ལྟར། །ལེགས་བཤད་གསར་པའི་བདུད་རྩི་ཡིས། །བློ་ལྡན་སྐྱེ་བོ་དབུགས་དབྱུང་བྱ། །དྲི་བཟང་བསྒོས་པའི་ཆུ་གཙང་དེ། །མཆོད་ཡོན་ཞབས་བསིལ་བསང་གཏོར་སོགས། །གང་དུ་བྱས་ཀྱང་ལེགས་པ་ལྟར། །ལེགས་བཤད་གཏམ་ནི་ཀུན་ལ་མཛེས། །ལུགས་གཉིས་བླང་དོར་ཤེས་པ་ཡིས། །གནས་སྐབས་མཐར་ཐུག་དོན་འགྲུབ་སྟེ། །བརྟག་པ་ཀུན་ལ་མཁས་པ་ཡི། །དེད་དཔོན་རྒྱ་མཚོར་ཞུགས་པ་བཞིན། །ཆུ་ཕྲན་བརྒལ་བར་མི་ནུས་དེས། །རྒྱ་མཚོ་རྐྱལ་གྱིས་ག་ལ་ཆོད། །ཡ་རབས་ལུགས་ཀྱང་མི་ཤེས་ན། །ཆོས་ཀྱི་དེ་ཉིད་ཇི་ལྟར་རྟོགས། །གཟུར་གནས་རིག་པར་ལྡན་པ་དེས། །གཞན་གྱི་ཡོན་ཏན་ལེན་པར་བྱེད། །སྤང་ལྗོངས་གཙང་མའི་དལ་འགྲོ་མ། །ལྷུང་ལྷུང་ཟེར་ཞིང་མེ་ཏོག་འཐུ། །ངན་པས་ཕྱོགས་མཐའ་བསྐོར་ན་ཡང༌། །སྐྱོན་གྱི་རིགས་རྣམས་སྡུད་པར་བྱེད། །ངམ་གྲོག་ས་རལ་ཅན་གྱི་ཆུས། །འདམ་གྱི་སྙིགས་མ་འདྲེན་དང་མཚུངས། །ཡོན་ཏན་དང་པོར་སློབ་དཀའ་ལ། །ཤེས་བཞིན་མེད་ན་ཉམས་པ་སླ། །ཆུ་ཐིགས་བསགས་པས་འགེངས་དཀའ་ཡང༌། །བོ་ན་ཅིག་ཅར་ཉིད་དུ་འཛད། །དཀའ་སྤྱད་ཁུར་དུ་འཁྱེར་ནུས་ན། །བྱ་བ་གང་ཡང་དཀའ་བ་མེད། །ཆུ་ཡི་ནང་དུ་ཞུགས་པ་དེར། །ཆར་གྱིས་ལྷག་པར་གནོད་མི་འགྱུར། །རྒྱུན་ཆགས་བརྩོན་པ་མ་བཏང་བར། །བགས་ཀྱིས་བསྒྲུབས་ན་ཅི་ཡང་འགྲུབ། །ཆུ་བོ་དལ་གྱིས་འབབ་པ་ཡིས། །ཡངས་པའི་ས་ཆེན་བསྐོར་ནས་འགྲོ། །བྱ་བ་ཆེན་པོ་ཡུན་གྱིས་བསྒྲུབ། །ངང་ཐུང་འབད་པས་མཐར་མི་ཕྱིན།། ཀླུང་ཆེན་དལ་ཡང་རིང་འགྲོ་ལ། །རྦ་རླབས་དྲག་ཀྱང་ཆེར་མི་འགྲོ། །བྱ་བ་ཉམས་ཀྱིས་མི་ལྕོགས་ན། །གཞན་གྱིས་རྦད་ཀྱང་བྱར་མི་རུང༌། །རྐྱལ་མི་ཤེས་ན་གཞན་དག་གིས། །བསྐུལ་ཡང་ཆུ་ནང་ཅི་ཕྱིར་མཆོང༌། །ཆུ་བོ་ཐུན་མོང་མཆོད་ཡོན་ཏེ། །ཉི་ཟླ་ཐུན་མོང་སྒྲོན་མེ་གསལ། །དམ་པ་ཐུན་མོང་གཙུག་རྒྱན་དང༌། །དམ་ཆོས་ཐུན་མོང་བདུད་རྩི་ཡིན། །དར་ཆེན་གྲུ་གཟིངས་རྒྱ་མཚོའི་རྒྱན། །སྤྲིན་བྲལ་ཟླ་བ་ནམ་མཁའི་རྒྱན། །མཁས་པའི་སྐྱེ་བོ་བསྟན་པའི་རྒྱན། །རུ་འདྲེན་དཔའ་བོ་དཔུང་གི་རྒྱན། །ཡ་རབས་མཛངས་སྤྱོད་དཔོན་དང་འབངས། །ཕན་ཚུན་ལེགས་ཚོགས་གོང་དུ་སྤེལ། །རྒྱ་མཚོ་ཆེ་དང་ཆུ་བོ་རྣམས། །རེས་མོས་ཚུལ་གྱིས་གྲོགས་སུ་འགྱུར། །རྗེ་བོ་ངན་དང་གཡོག་ངན་པ། །གཉིས་ཀས་གཉིས་ཀ་རྒུད་བྱེད་དེ། །རྫ་གསར་ནང་དུ་ཆུ་བླུག་ན། །གཉིས་ཀ་ཆུད་ཟོས་བརླག་པར་འགྱུར། །ཤེས་རློམ་དབང་ཅན་མང་བ་ཡིས། །ཡུལ་ཁམས་མདུན་གྲོས་འཇིག་འགྱུར་ཏེ། །གཡས་གཡོན་ཀུན་ནས་ཆུ་འབུར་བའི། །ས་ལ་མཁར་ཁྱིམ་བརྟེན་མི་སྲིད། །རྗེ་འབངས་མཐུན་ན་དགྲ་སྡེ་ཡིས། །ཐུབ་དཀའ་སོ་སོར་གྱེས་ན་མིན། །རྟ་ཡིས་བརྒལ་དཀའི་ཆུ་བོ་ཡང༌། །མང་དུ་གྱེས་ན་ལུག་ཀྱང་བགྲོད། །ཆོས་ལྡན་རྒྱལ་པོས་ཁྲལ་བསྡུས་ཀྱང༌། །དེ་ཉིད་ཀྱིས་ནི་འབངས་རྣམས་སྐྱོང༌། །སྤྲིན་ཆེན་རྒྱ་མཚོའི་ཆུ་དྲངས་ཏེ། །དལ་གྱིས་འབེབས་པས་འཛིན་མ་སྐྱོང༌། །རྒྱལ་ངན་འབངས་ཀྱི་ཟས་ནོར་ཀུན། །ཕྲོགས་ཀྱང་ད་དུང་ལྟོགས་ཤིང་བཀྲེན། །རྒོད་མ་ཁ་ཡིས་རྒྱ་མཚོའི་ཆུ། །འཐུངས་ཀྱིན་རྟག་ཏུ་འབར་དང་མཚུངས། །གཙོ་བོ་ངན་པ་རྟག་བཀུར་ཡང༌། །གསུག་དང་བྲལ་བ་ཙམ་གྱིས་སྡང༌། །ཆུ་བོ་ཉིན་ཞག་མང་བསྐོལ་ཀྱང༌། །མེ་དང་བྲལ་བའི་མོད་ལ་གྲང༌། །ཁེངས་དྲེགས་གདུག་རྩུབ་ཆེ་བ་ཡི། །དཔོན་ལ་སུ་ཡང་བརྟེན་མི་སྤྲོ། །ཤིན་ཏུ་འཁྲུགས་པའི་རྦ་ཀློང་དུ། །ཉ་ལ་སོགས་ཀྱང་སྡོད་མི་བྱེད། །བརྩེ་ཞིང་ཕན་གདགས་ནུས་པ་དེར། །སྐྱེ་བོ་ཐམས་ཅད་ངང་གིས་འདུ། །ཡིད་བཞིན་གྱི་ནི་རྒྱ་མཚོའི་ངོགས། །འགྲོ་བ་ཀུན་གྱིས་སྟེན་པར་བྱེད། །ཆེ་མཐོ་བསྟེན་པས་དཔལ་འཐོབ་ཀྱང༌། །དེ་ལས་ལྷག་པའི་འཇིགས་པ་འབྱུང༌། །རྒྱ་མཚོ་རིན་ཆེན་འབྱུང་གནས་དེ། །གདུག་ཅན་ན་ཀྲའི་གྲོང་ཡང་ཡིན། །རྒྱུས་མེད་མི་ལ་གསར་འགྲོགས་ཀྱིས། །ཡིད་བརྟན་བྱེད་པ་ཉམས་པའི་རྒྱུ། །རྒྱལ་སྲས་ངང་པའི་སྡེ་དཔོན་ཡང༌། །མཚོ་གསར་བརྟེན་པས་རྙི་ཡིས་ཟིན། །རྣ་བ་སྲབ་པའི་མཛའ་གཅུགས་དེ། །རིང་མིན་དབྱེན་གྱིས་སོ་སོར་གཏོང༌། །ཆུ་དང་འོ་མ་རོ་གཅིག་ཏུ། །འདྲེས་པ་ངང་པའི་མཆུ་ཡིས་འབྱེད། །མཁས་པས་བདེན་རྫུན་བརྟགས་ནས་བྱེད། །བླུན་པོ་གྲགས་པའི་རྗེས་སུ་རྒྱུག །ཆུ་ནང་ཅལ་གྱི་སྒྲ་བསྒྲགས་པས། །གཅན་གཟན་རི་དྭགས་ཕལ་ཆེར་བྲོས། །འགྲོགས་ན་ལེགས་སྤྱོད་འཕེལ་འགྲིབ་ལས། །དགེ་དང་སྡིག་པའི་གྲོགས་འགྱུར་ཏེ། །དྭངས་བསིལ་འདྲ་ཡང་ཕན་གནོད་ལས། །སྨན་གྱི་ཆུ་དང་དུག་ཆུར་འཇོག །སྡིག་གྲོགས་གཡེམ་མའི་འཛུམ་དཀར་ལས། །ཤ་ཚའི་གདུག་རྩུབ་ཁྲོ་གཉེར་བཟང༌། །ཐན་ཁྱེར་སྤྲིན་གྱི་མདོག་དཀར་ཡང༌། །ཆུ་ལྡན་སྤྲིན་ནག་ཞིང་པའི་གསོས། །བློ་ལྡན་རང་བཞིན་བཟང་པོ་དེ། །མཆོག་དམན་བར་མ་ཀུན་གྱིས་སྟེན། །འཇུག་ངོགས་བདེ་བའི་རྫིང་བུ་ལ། །སྐྱེ་བོ་ཐམས་ཅད་དགའ་བཞིན་འཇུག །ཁེངས་དྲེགས་སྤྱོད་པ་རྩིང་བ་ལ། །དོན་མེད་རྣམས་ཀྱང་དགྲ་རུ་ལྡང༌། །རྒྱགས་ཤིང་འཕྱར་བའི་གངྒཱ་མ། །ཛཧྣུ་ཁྲོས་པས་ཧུབ་ཀྱིས་བཏུངས། །ཉམ་ཆུང་སྟེང་དུ་དཔའ་ཐལ་ན། །ཉམ་ངའི་གཡང་དུ་ལྷུང་འགྱུར་ཏེ། །ཆུ་ལ་རྐྱལ་གྱིས་དྲེགས་པའི་ཉ། །སྐམ་ལ་ཡར་ན་འཆི་བར་འགྱུར། །རིགས་ངན་ཅུང་ཟད་འབྱོར་ན་ཡང༌། །རྒྱལ་པོ་ལྟ་བུའི་ཁེངས་དྲེགས་འཛིན། །གཅོང་རོང་དོག་མོའི་ཆུ་ཕྲན་དེ། །འུར་སྒྲ་རྒྱ་མཚོའི་རྦ་ཀློང་འདྲ། །ཡངས་པའི་རྒྱལ་ཁམས་མ་མཐོང་བ། །ས་མཐའི་བླུན་པོ་རང་མཐོང་ཆེ། །ཁྲོན་པའི་ཆུ་ལ་འགྱིངས་པ་ཡི། །རུས་སྦལ་རྒྱ་མཚོའི་གཏམ་གྱིས་ཤི །ཐ་ཤལ་རྣམས་ནི་མགུ་སླ་ཞིང༌། །མགུ་བའི་མོད་ལ་ཁྲེལ་ཡང་སླ། །ཕུ་ཐག་ཐུང་བའི་ཆུ་ཕྲན་དེ། །བྲུབས་དང་བྲི་བ་ཡུད་ཙམ་ཡིན། །མ་རབས་གཅེས་པར་བསྐྱངས་ན་ཡང༌། །དྲིན་དུ་མི་ཚོར་འཁྲུག་པར་བྱེད། །བསིལ་བའི་ཆུ་ཡིས་བྲན་ན་ཡང༌། །རྡོ་ཞུན་ལྷག་པར་ཁོལ་ཞིང་ཚ། །དམ་པ་རྣམས་ལ་གནོད་བྱས་ཀྱང༌། །ཁྲོ་མེད་བཟོད་པས་བདེ་བར་གནས། །བཙོ་ཡི་སྔགས་ཀྱིས་བཏབ་པའི་ཆུ། །ཁོལ་བཞིན་པ་ཡིས་བྲན་ཀྱང་བསིལ། །ཁྲེལ་མེད་རྣམས་ལ་ཕན་བཏགས་ཀྱང༌། །བྱ་བ་ཟིན་ན་བརྗེད་པར་འགྱུར། །ཆུ་བོའི་ཕ་རོལ་བརྒལ་བ་ན། །གྲུ་གཟིངས་ལྟོས་པ་མེད་པར་འདོར། །མི་ངན་རེ་རེའི་བྱེད་པས་ཀྱང༌། །ཡུལ་ཁམས་ཆེན་པོ་འཕུང་བར་བྱེད། །དྲང་སྲོང་གདུག་པ་མཆོངས་པ་ཡིས། །སི་ཏཱ་ཚལ་བརྒྱར་གྱེས་ཞེས་གྲགས། །དམུ་རྒོད་སྐྱེ་བོས་སུན་ཕྱུང་རྣམས། །དམ་པ་ལ་ཡང་ཡིད་མི་ཆེས། །ཆུ་ཟླས་བསླུས་བྱས་ངང་པ་ཡིས། །ཉིན་མོའང་པད་རྩ་ཟ་མི་བྱེད། །སྐྱེ་བོ་ངན་པ་བཅོས་ན་ཡང༌། །རྐྱེན་དང་འཕྲད་ཚེ་རང་མཚང་སྟོན། །ཆུ་ཀླུང་འོལ་ཁ་བསྒྱུར་བ་དེ། །བྲུབས་ཚེ་སྔར་གྱི་ལམ་དུ་འགྲོ། །དམ་པ་མཐོ་དམན་འབྱོར་རྒུད་སོགས། །ཅིས་ཀྱང་རང་བཞིན་མི་འགྱུར་ཏེ། །ཆུ་བོ་བསིལ་ལམ་ཚ་ན་ཡང༌། །རླན་གྱི་རང་བཞིན་ག་ལ་འདོར། །མི་བསྲུན་སྐྱེ་བོ་གདམས་པ་ལས། །ནན་ཏུར་ལས་ཀྱིས་གདུལ་བར་སླ། །གོས་ཀྱི་དྲི་མ་འཁྲུད་པ་ལ། །གཙང་མའི་ཆུ་ལས་འགྱུར་བྱེད་བཟང༌། །ལུས་ཅན་ནང་གི་སྐྱོན་ཡོན་རྣམས། །ཕྱི་རོལ་སྤྱོད་པས་མཚོན་ནུས་ཏེ། །ཆུ་སྐྱར་ལྡིང་བས་ཆུ་བོ་དང༌། །དུ་བ་ལས་ནི་མེར་ཤེས་བཞིན། །གཞན་གྱི་སྐྱོན་ཡོན་མཐོང་སླ་ཡང༌། །རང་གི་སྤྱོད་ཚུལ་མཐོང་བར་དཀའ། །མཚོ་ནང་ནམ་མཁའི་ཟླ་སྐར་ཀུན། །གསལ་ཡང་རང་གི་གཏིང་མི་མཐོང༌། །བསམ་ངན་གཡོ་སྒྱུའི་བྱ་བ་ནི། །ལམ་རྒྱུག་འདྲ་ཡང་ཕུགས་སུ་འཕུང༌། །ཆུ་ཀླུང་གྱ་གྱུར་བགྲོད་པ་ཡང༌། །བབས་ཀྱིས་ཐུར་ནས་ཐུར་དུ་འགྲོ། །རིགས་རྒྱུད་ཟད་འདོད་བུ་ངན་སྐྱེ། །བསོད་ནམས་ཟད་འདོད་བསམ་ངན་འཆར། །རང་ཉིད་བརླག་འདོད་རིག་པ་རྒོད། །ཆུ་མིག་སྐམ་འདོད་སྙིགས་མ་མང༌། །བླུན་པོས་ངལ་བརྒྱས་བསྒྲུབས་ན་ཡང༌། །གྲགས་པ་བློ་ལྡན་གཞན་གྱིས་འཁྱེར། །རི་ལས་སྐྱེས་པའི་པདྨ་ཡང༌། །བསྐྱེད་པའི་གྲགས་པ་ཆུ་ཡིས་འཐོབ། །ལུང་རྟོགས་ཡོན་ཏན་མི་ལྡན་ཡང༌། །དམ་པར་སྒྲོག་པས་སྐྱེ་བོ་བསླུ། །སྦྲང་ཆར་བཅུད་དང་བྲལ་བ་ཡི། །ཐན་ཁྱེར་སྤྲིན་གྱི་འབྲུག་སྒྲ་བཞིན། །སྙིགས་དུས་རང་བྱུང་ཀུན་མཁྱེན་རྣམས། །སྦྱངས་ཚེ་ཕལ་བ་ལས་ཀྱང་རྟུལ། །རང་བྱུང་ཆུ་ཚན་སྔར་ཚ་ཡང༌། །བསྐོལ་ན་ཆུ་གྲང་རྗེས་སུ་ཁོལ། །དྲེད་པོ་ཁ་ཡིས་ཆོས་བཤད་མཁན། །ཤེས་རྒྱུད་གདོལ་བ་ལས་ཀྱང་ཐུ། །དགུན་དུས་རླངས་པ་ན་བུན་བཞིན། །འཐིབས་པའི་ཀློང་དེ་ལྷག་པར་གྲང༌། །དམ་པའི་སྐྱེ་བོ་ཉམ་ཐག་ཀྱང༌། །ཆོས་དང་འགལ་བའི་ལས་མི་བྱེད། །ཆར་སྡོད་བྱེའུ་སྐོམ་ན་ཡང༌། །ས་ལ་བབས་པའི་ཆུ་མི་འཐུང༌། །དགེ་སྦྱོར་བརྩོན་པར་འདོད་པ་དང༌། །ལོག་པའི་འཚོ་བ་སྒྲུབ་པ་འགལ། །མེ་ཏོག་སྐྱེད་པར་འདོད་པ་ཡིས། །ཆུ་ཚན་བླུགས་ན་ཕན་འགྱུར་རམ། །ཆེན་པོ་རེ་ཞིག་རྒུད་ན་ཡང༌། །སླད་ནས་གཟི་བྱིན་རྒྱས་པར་འགྱུར། །འཁྱག་པའི་སྦུབས་སུ་ཆུད་པའི་མཚོ། །སོ་ག་རིམ་གྱིས་འཕྱུར་ནས་འོང༌། །བློ་དང་རྩོལ་བ་ཞན་པའི་མིས། །ཕུན་ཚོགས་ཐོབ་ཀྱང་མོད་ལ་འགྲིབ། །རྫིང་ཆུང་ལྟག་ཆུ་ཆད་པ་དེ། །གང་ཡང་མྱུར་དུ་སྐམ་པར་འགྱུར། །ནོར་མེད་མཆོར་དང་ཁ་ཞིམ་འདོད། །གཞུང་ལུགས་མ་སྦྱངས་མཁས་ཁུར་འཛིན། །ཆུ་རྐྱལ་མི་ཤེས་མཚོ་བརྒལ་བ། །བསམ་བཞིན་རང་སྡུག་ཉོས་པ་ཡིན། །མངའ་ཐང་བློ་རྒྱ་སྐྱེད་ཆེས་པས། །བསོད་ནམས་ཚད་ལས་འགོང་མི་རུང༌། །མཚོ་ཆུང་རང་གི་ཁྲོན་པ་ཡི། །ཚད་ལས་རྒྱས་ན་བོ་བར་འགྱུར། །དོན་ཆེན་ཐོག་ཏུ་མ་བབས་པའི། །དུས་ནས་ཐབས་དང་རིམ་གྲོ་བྱ། །ཆུ་ལོན་སྔར་ནས་མ་བརྩིགས་ན། །བྲུབས་ནས་འོལ་ཁ་བསྒྱུར་བ་དཀའ། །དོན་མེད་ལས་ལ་ཕོད་བཙུགས་ནས། །རང་ཉིད་ཉམས་བྱེད་དཔའ་བོ་མིན། །ཆུ་ཡི་ནང་གི་གཟུགས་བརྙན་ལ། །མཆོངས་པས་སེངྒེ་ཤི་དང་འདྲ། །དགྲ་བོ་འདུལ་བར་འདོད་ན་ཡང༌། །སྤྱོད་ཚུལ་དལ་ཞིང་འཇམ་པར་བྱ། །ཆུ་སྐྱར་འཇབ་ཅིང་འགྲོ་བ་ཡིས། །ཉ་ལ་སོགས་པ་འཛིན་ལ་ལྟོས། །གཞན་ཕྱོགས་འབྱོར་པ་ལ་སྡང་བས། །རང་གི་བསོད་ནམས་ཉམས་པར་ཟད། །ཆུ་ཀླུང་དྲག་པོར་མཆོངས་པ་ན། །བདག་ཉིད་འཆི་ཡི་དེར་མི་གནོད། །དེ་བས་དགྲ་ལས་རྒྱལ་འདོད་ན། །ཡོན་ཏན་སྒྲུབ་ལ་འབད་པར་བྱ། །ཆུ་བོ་ཆེ་ལ་བརྒལ་བའི་ཐབས། །ཐང་ནས་གྲུ་གཟིངས་འཆོས་པ་ཡིན། །རང་ལས་བསོད་ནམས་མ་ཉམས་ན། །དགྲ་བོ་ཁོ་ནས་མི་ཐུབ་སྟེ། །ཆུ་མིག་རང་ཉིད་མ་སྐམ་པར། །ས་ཡིས་མནན་ཀྱང་འགོག་མི་ནུས། །དབུལ་ཕྱུག་དར་རྒུད་མཐོ་དམན་ཀུན། །སྔོན་སྤྱོད་ལས་ཀྱི་གོ་རིམ་སྟེ། །ཆུ་ཡི་དཀྱིལ་འཁོར་བསྲུབས་པ་ལས། །རི་གླིང་ཁོར་ཡུག་རིམ་པར་ཆགས། །མཁས་པ་ཕལ་ཆེར་དབུལ་འགྱུར་ལ། །བླུན་པོའི་སྐྱེ་བོ་ནོར་གྱིས་ཕྱུག །རྙོག་མ་ཅན་གྱི་ཆུ་བོ་ལ། །སྦལ་ལྕོང་འབུ་སྲིན་ལྷག་པར་མང༌། །བརྒྱ་ཡི་ནང་ནས་དཔའ་བོ་དང༌། །སྟོང་གི་ནང་ནས་མཁས་པ་སྟེ། །མ་དྲོས་མཚོ་ལས་ཆུ་གསེར་དང༌། །རྒྱ་མཚོ་ཆེ་ལས་ནོར་བུ་འབྱུང༌། །བློ་དང་མི་ལྡན་སྐྱེ་བོ་ཡིས། །འབྱོར་པ་བརྙེད་ཀྱང་སྤྱོད་མི་ཤེས། །ཁྱི་ནི་སྐོམ་ཡང་ཆུ་ཀླུང་ལ། །ཧུབ་ཀྱིས་མི་འཐུང་ལྡག་པར་བྱེད། །རང་གཞན་སུ་ལའང་མི་ཕན་པའི། །ནོར་དེ་མེད་པ་ཉིད་དང་མཚུངས། །ཆུ་མེད་ས་གཞི་རྒྱ་ཆེ་ཡང༌། །མྱ་ངམ་ཐང་ཞེས་ཀུན་གྱིས་འདོར། །ལོངས་སྤྱོད་སྤེལ་བར་འདོད་པས་ཀྱང༌། །ཅུང་ཟད་གཏོང་ཚུལ་ཤེས་དགོས་ཏེ། །ཁྲོན་ཆུ་བཅུས་ན་འཕེལ་འགྱུར་ཞིང༌། །བཞག་ན་སྙིགས་མས་སྐམ་པར་འགྱུར། །བླུན་རྨོངས་འབྱོར་པ་རྒྱ་ཆེ་ཡང༌། །སྡུག་བསྔལ་རྒྱུ་ལས་མ་འདས་ཏེ། །གསེར་རིའི་བར་གྱི་རོལ་མཚོ་རྣམས། །རྟག་ཏུ་མུན་པའི་སྨག་གིས་ནོན། །འབྱོར་ལྡན་བསོད་ནམས་གསོག་དགོས་ཏེ། །བསོད་ནམས་ཉམས་ན་རྒུད་པ་སླ། །ལྗོན་ཤིང་ཡལ་ག་རྒྱ་ཆེ་ཡང༌། །ཆུ་དང་བྲལ་ན་སྐམ་པར་འགྱུར། །བསོད་ནམས་མཐུ་དང་དགེ་བའི་བློ། །ཕན་ཚུན་རྒྱུར་གྱུར་སྐལ་བ་བཟང༌། །ཆུ་ཡིས་ཆར་དང་ཆར་གྱིས་ཆུ། །རྒྱས་བྱེད་རེས་མོས་གྲོགས་སུ་འགྱུར། །ཁ་བཤད་མང་ངམ་ཉུང་ཡང་རུང༌། །དགོས་དོན་ལག་ཏུ་བླངས་ན་གོ །ཆུ་ཞེང་ཆེ་ཆུང་ཅི་འདྲ་ཡང༌། །ཟབ་དང་མི་ཟབ་བརྒལ་ན་ཤེས། །ལེགས་བྱས་སྲོལ་འབྱེད་མཁས་པ་སྟེ། །དེ་ཡི་རྗེས་སུ་འཇུག་པ་སླ། །ཅང་ཤེས་རྟ་ཡིས་རབ་བཙལ་བའི། །ཕྱི་བཞིན་ཁྱི་ཡང་འབྲང་བར་བྱེད། །མཁས་པ་ཀུན་ལ་སྙོམས་ལྡན་ཞིང༌། །ཕྱོགས་རེའི་མིག་ཅན་ཆགས་སྡང་ཆེ། །བུམ་པ་གང་བ་བཀུར་བར་སླ། །ཕྱེད་ཙམ་གང་བ་ཡོ་འཁྱོམ་མང༌། །བསམ་ཚད་ཁ་རུ་འདོན་པ་དེར། །གཏད་སོ་མེད་ཅེས་ཀུན་གྱིས་བརྙས། །ཤག་ཤག་འབབ་པའི་ཆུ་བོ་ལ། །བྱིས་པ་རྣམས་ཀྱང་རྒལ་བར་བྱེད། །ཁ་ཉུང་བཞིན་འཛུམ་གནད་ཕིགས་པ། །དེ་ལ་ཀུན་གྱིས་བག་ཟོན་བྱེད། །སྒྲ་མེད་མེར་གྱིས་འགྲོ་བ་ཡི། །ཆུ་ཀླུང་གཏིང་མཐའ་དཔོག་པར་དཀའ༌། །ཆུ་ལ་རི་མོར་བྲིས་པ་བཞིན། །སྡིག་སེམས་མོད་ལ་འདོར་བྱ་ཞིང༌། ། དགེ་བའི་དམ་བཅའ་རྡོ་བ་ཡི། །རི་མོ་བཞིན་དུ་བརྟན་པར་བྱེད། །བསམ་པ་བཟང་ན་འཇིག་རྟེན་གྱི། །བྱ་བ་ཀུན་ཀྱང་ཆོས་སུ་འགྲོ། །ཟོ་ཆུན་ལ་བརྟེན་འོབས་ཀྱི་ཆུ། །ཤིན་ཏུ་མཐོ་བའི་རི་རྩེར་འགྲོ། །གཙོ་བོར་ལས་འབྲས་དཀོན་མཆོག་ལ། །བློ་ཕུགས་གཏད་ན་ཅི་བསམ་འགྲུབ། །ལྷ་ཡི་རྒྱལ་པོས་ཆར་ཕབ་ན། །ལོ་ཏོག་ཕུན་སུམ་ཚོགས་པར་འགྱུར། །འཇིག་རྟེན་ཚངས་པའི་རལ་ཀློང་དུ། །འཁྱམས་པའི་སརྒ་མཐར་སོན་ཏེ། །སྒྲིབ་གཉིས་དྲི་མ་འཁྲུད་པའི་ཕྱིར། །དམ་པའི་ཆོས་ཀྱི་ལམ་དུ་འདྲེན། །
ཆོས་ཀྱི་སརྒ།
ཆུ་རིགས་བདུན་ལས་མཆོག་གྱུར་པའི། །ཆུ་མགོ་གངས་ལ་ཐུག་པ་བཞིན། །ཆོས་ཀྱང་འཁྲུལ་བྲལ་མ་ནོར་བ། །རྒྱལ་བའི་བཀའ་ལས་འབྱུང་བ་དགོས། །དེ་ནས་ཟབ་རྒྱས་ཉམས་ལེན་གྱི། །ལམ་གསུམ་རིམ་པར་འབབ་པ་ཡི། །གདམས་ངག་ཚང་ལ་མ་ནོར་བ། །སྐལ་བཟང་རྣམ་སད་མཆོད་ཡོན་ཡིན། །འོན་ཀྱང་དུས་ཀྱི་ཆེར་སྙིགས་ཚེ། །འཇམ་དབྱངས་བླ་མས་གསལ་མཛད་དེ། །རྒྱ་མཚོར་བྱིངས་པའི་རིག་བྱེད་བཞི། །ཉ་ཡི་གཟུགས་ཀྱིས་བཏོན་པ་བཞིན། །འདི་འདྲའི་བསྟན་དང་མཇལ་བཞིན་དུ། །ལྟར་སྣང་ལམ་ལ་སུ་ཞིག་འཇུག༌། །ལྷ་ཡི་ཆུ་བོ་གངྒཱའི་རྩར། །བ་ཚྭའི་ཁྲོན་པ་སུ་ཞིག་རྐོ། །བློ་ཆུང་སྐལ་དམན་ཟབ་ཟབ་ཀྱི། །གྲགས་པས་བསླུས་ནས་ལོག་པར་འགྲོ། །སྨིག་རྒྱུ་ཆུ་རུ་འཁྲུལ་བ་ཡི། །རི་དྭགས་དོན་མེད་སྡུག་བསྔལ་མྱོང༌། །ཆོས་ཀྱི་ལམ་དུ་འཇུག་པ་ལ། །དང་པོར་དགེ་བའི་བཤེས་གཉེན་བསྟེན། །རྒྱ་མཚོར་བགྲོད་འདོད་བྱ་བའི་འགོ །དེད་དཔོན་མཁས་པ་ཚོལ་བ་ཡིན། །འཇིག་རྟེན་འཇིག་རྟེན་འདས་པ་ཡི། །དགེ་ལེགས་རྩ་བ་བླ་མ་སྟེ། །འཛམ་གླིང་རྩི་ཤིངལོ་འབྲས་ཀུན། །མ་དྲོས་མཚོར་གནས་ཀླུ་ཡི་དྲིན། །ང་རྒྱལ་སྤངས་ཏེ་ཞི་དུལ་གྱིས། །དམ་ཆོས་སྣོད་དུ་རུང་བར་བྱ། །ཆུ་བོ་སྒང་དུ་མི་གནས་པར། །དམའ་བའི་གཤོང་དུ་འཁྱིལ་བར་འགྱུར། །ཆོས་ཀུན་ཅིག་ཅར་མི་ཤེས་ཀྱང༌། །ཅི་ཙམ་ཤེས་བཞིན་དོན་དུ་འགྱུར། །ཆུ་ཀླུང་རྫོགས་པར་མ་འཐུངས་ཀྱང༌། །ཅི་ཙམ་བཏུངས་པས་སྐོམ་པ་སེལ། །ཐོས་མང་ཉམས་སུ་མ་བླངས་ན། །རང་གི་རྒྱུད་ལ་མི་ཕན་ཏེ། །ཆུ་ནང་ལོ་བརྒྱར་གནས་པ་ཡི། །རྡོ་བའི་རང་བཞིན་སྐམ་པོར་གནས། །སྟོང་རྐྱལ་གོམ་པའི་རིམ་པ་ཡིས། །རྟག་འཇུ་རེས་འཇུ་མི་འཇུ་ལྟར། །ཐོས་བསམ་སྒོམ་པ་སྒྲ་སྤྱི་ལ། །བརྟེན་པའི་ཚུལ་ཡང་གསུམ་དུ་གསུངས། །མི་ཡི་གྲུ་གཟིངས་རྙེད་དུས་འདིར། །ཐོས་བསམ་སྒོམ་པའི་བ་དན་ལ། །བརྟེན་ནས་སྲིད་མཚོ་བརྒལ་བྱ་ཡི། །གྲུ་འདི་ཕྱི་ནས་རྙེད་པར་དཀའ། །རིགས་དྲུག་སྐྱེ་སྒོ་མཐའ་ཡས་ཀྱང༌། །དལ་བརྒྱད་ཚང་བ་ཤིན་ཏུ་དཀོན། །ཆུ་བོ་གྲངས་མེད་འབབ་ན་ཡང༌། །ཡན་ལག་བརྒྱད་ལྡན་རེ་རེ་ཙམ། །སྐྱེས་པའི་སྐད་ཅིག་དེ་ཉིད་ནས། །མི་སྡོད་འཆི་བདག་ཁར་ཕྱོགས་ཏེ། །ཆུ་ཀླུང་སྐད་ཅིག་རེ་རེ་ཞིང༌། །ཕྱིར་མི་ལྡོག་པར་རྒྱ་མཚོར་འགྲོ། །མི་རྟག་སྲིན་པོས་བཟུང་བཞིན་དུ། །སོས་བདེར་སྡོད་པ་ག་ལ་རིགས། །ཆུ་སྲིན་མཆེ་བའི་ཕྲག་གནས་ལ། །བདེ་བའི་གོ་སྐབས་ནམ་ཡང་མེད། །བསྒྲུབས་ཀྱང་ཕ་མཐར་ཕྱིན་མེད་པའི། །འཇིག་རྟེན་བྱ་བ་བཙན་ཆོད་བྱ། །ཆུ་གཉེར་གཅིག་རྗེས་གཅིག་ནོན་ཏེ། །ཅི་ཙམ་བབས་ཀྱང་ཟིན་དུས་མེད། །བློ་རིག་སྟོབས་དང་རྩལ་ཆེ་ཡང༌། །དུས་ཀྱི་ཕོ་ཉས་དབང་མེད་འཆིང༌། །ཆུ་ཆེན་རླབས་ཀྱི་གར་མཁན་མ། །དགུན་དུས་འཁྱག་པའི་སྦུབས་སུ་ཚུད། །སྒོ་གསུམ་མི་དགེའི་སྤྱོད་ཚུལ་འདིས། །ཕྱི་མའི་སྐྱེ་བ་ངན་འགྲོར་ངེས། །རི་བོའི་ཟོམ་ནས་འབབ་པའི་ཆུ། །གཡང་ས་བརྒྱུད་མར་བརྡབ་ཅིང་འཕྱོ། །དེ་ནས་ལོ་གྲངས་བྱེ་བ་བརྒྱར། །བསྲེགས་ཤིང་འཚེད་ཀྱང་འཆི་མི་ནུས། །རྡོ་སོལ་རི་ལ་ཆར་གྱི་རྒྱུན། །བབས་པ་བསྐལ་པའི་བར་དུ་ཁོལ། །འཇིགས་ཆེན་དེ་ལས་སྐྱོབ་པའི་སྐྱབས། །སླུ་མེད་དཀོན་མཆོག་གསུམ་ལས་མེད། །ཆུ་བོའི་རྒྱུན་གྱིས་ཁྱེར་བ་དེ། །སྒྲོལ་བྱེད་མཉན་པ་ཁོ་ནར་ངེས། །མཆོག་གསུམ་བྱིན་རླབས་མཐའ་ཡས་ཀྱང༌། །དད་པ་མེད་ན་ཇི་ལྟར་སྐྱོབ། །རྒྱ་མཚོ་ཆེ་ཡང་ཆར་སྡོད་ཀྱི། །བྱིའུའི་སྐོམ་པ་སེལ་མི་ནུས། །འཁོར་བའི་འདམ་ལས་མ་བརྒལ་བའི། །འཇིག་རྟེན་པ་ལ་བརྟེན་མི་བྱ། །ཆུས་ཁྱེར་ཆུ་ཡིས་ཁྱེར་བ་ལ། །འཇུས་ན་གཉིས་ཀ་བྱིང་བར་འགྱུར། །མཆོག་གསུམ་བསྟེན་ན་དེ་ཡི་ཁྲིམས། །ལས་འབྲས་བླང་དོར་འབད་པ་གཅེས། །དེད་དཔོན་བསྟེན་ཀྱང་གྲུ་གཟིངས་སུ། །མི་སྡོད་དེ་ཉིད་ཇི་ལྟར་སྒྲོལ། །སྣོད་བཅུད་བདེ་སྡུག་སྣང་བ་ཀུན། །འཁྲུལ་མེད་སྔོན་བསགས་ལས་ལས་འབྱུང༌། །ཆུ་ཕོར་གང་ཡང་འགྲོ་བ་བཞིར། །སྣང་ཚུལ་ཐ་དད་འབྱུང་བར་གསུངས། །དགེ་དང་མི་དགེ་ཆུང་ངུ་ནས། །བསགས་པས་ཤེས་རྒྱུད་གང་འགྱུར་ཏེ། །ཆར་གྱི་ཐིགས་པ་བསགས་པས་ཀྱང༌། །མཐའ་ཀླས་ཆུ་ཡི་དཀྱིལ་འཁོར་ཆགས། །གནས་སྐབས་དགེ་བ་ལྟར་སྣང་ཡང༌། །བསྔོ་དང་འདུན་པས་བསླད་པ་མང༌། །མཆོག་ཏུ་མངར་བ་གངྒ྄ཱའི་ཆུ། །རྒྱ་མཚོར་འདྲེས་ན་ཁ་བར་འགྱུར། །རྨོངས་པའི་མུན་ནག་གིས་ལྡོངས་ཤིང༌། །ལས་ཀྱི་ཞགས་པས་བཅིངས་པ་རྣམས། །སྲེད་པའི་ཀླུང་གིས་རབ་དྲངས་ཏེ། །མི་བཟད་སྐྱེ་བའི་རྒྱ་མཚོར་འགྲོ། །འདོད་པ་ལན་ཚྭའི་ཆུ་བོ་ནི། །ཅི་ཙམ་སྤྱད་ཀྱང་མི་ངོམས་པས། །ཆུ་མཚོ་འཁྱགས་པའི་ངང་པ་ལྟར། །སྲིད་ལས་ངེས་འབྱུང་སྐྱོ་ཤས་སྐྱེད། །ལས་ཉོན་ན་ཀྲས་ཡོངས་གང་བ། །སྡུག་བསྔལ་འཁོར་བའི་རྒྱ་མཚོ་ལས། །སྒྲོལ་བྱེད་བསླབ་གསུམ་གྲུ་བོ་ཆེ། །བཟུངས་ནས་ཐར་པའི་གླིང་དུ་གཤེགས། །ཁྱད་པར་ཁས་བླངས་ཚུལ་ཁྲིམས་ནི། །ཉེས་ལྟུང་དྲི་མས་མ་སྦགས་པ། །རྒྱ་མཚོ་རོ་དང་མི་འགྲོགས་ལྟར། །རྟག་ཏུ་དྲན་ཤེས་བརྟན་པོས་སྲུངས། །འོན་ཀྱང་མ་རྒན་སེམས་ཅན་རྣམས། །དོར་ནས་རང་དོན་བྱར་མི་འོས། །རྒྱ་མཚོའི་གླིང་དུ་གཉེན་བཤེས་ཀུན། །འབོར་བ་དེད་དཔོན་སྤྱོད་ཚུལ་མིན། །མཚོར་གནས་གཡོ་དང་མི་ལྡན་པའི། །ཁྱད་པར་གསུམ་ལྡན་ཆུ་ཟླ་ལྟའི། །འགྲོ་ལ་སྙིང་རྗེ་རྣམ་གསུམ་གྱིས། །ཐེག་ཆེན་ལམ་གྱི་སྲོག་རྩ་ཚུགས། །བྱང་ཆུབ་སེམས་ཀྱིས་ཟིན་པའི་དགེ །མི་ཟད་བྱང་ཆེན་རྒྱུར་འགྲོ་སྟེ། །ཛམ་བུའི་འབྲས་བུ་མ་དྲོས་མཚོར། །ལྷུང་བས་གསེར་སྦྱངས་ཁམས་སུ་འགྱུར། །རྒྱལ་སྲས་སྤྱོད་པ་མཐའ་ཀླས་ཀྱང༌། །ཕ་རོལ་ཕྱིན་པ་དྲུག་ཏུ་འདུ། །རི་སུལ་ལ་ལུང་ཆུ་བོ་བརྒྱ། །ཟམ་འོག་གཅིག་ཏུ་འདྲིལ་བ་བཞིན། །རྒྱལ་སྲས་རྣམས་ནི་བདོག་པ་ཀུན། །འབྲས་བཅས་གཏོང་སྟེ་སྦྱིན་པའི་མཆོག །ཆར་གྱིས་རྩི་བཅུད་ལོ་ཏོག་ཀུན། །བསྐྱངས་ཀྱང་ལན་དང་རེ་བ་མེད། །རྣམ་དག་ཁྲིམས་ཀྱིས་ཉེས་ལྟུང་གི །རྙོག་པ་མ་ལུས་དྲུངས་འབྱིན་ཏེ། །ཀེ་ཏ་ཀ་འབྲས་བྱེ་མ་ཡིས། །ཆུ་བོའི་རྙོག་མ་དྭངས་པར་བྱེད། །དགེ་ཚོགས་མ་ལུས་སྲེག་བྱེད་པའི། །ཁོང་ཁྲོའི་དགྲ་འཇོམས་བཟོད་པ་སྟེ། །ཀུན་ཟ་འབར་བའི་མེ་ལྕེ་ནི། །གསོད་བྱེད་གཉེན་པོ་ཆུ་ཡིན་ནོ། །རྟག་གུས་བརྩོན་པ་མ་བཏང་ན། །མི་འགྲུབ་བྱ་བ་ཅི་ཡང་མེད། །ཆུ་ཐིགས་རྟག་ཏུ་འབབ་པ་ཡིས། །བྲག་གི་རི་བོ་འབིགས་ལ་ལྟོས། །བྱིང་རྒོད་སྐྱོན་བྲལ་ཏིང་ངེ་འཛིན། །གསལ་བར་ཡོན་ཏན་ཐམས་ཅད་འཆར། །བཻཌཱུར་མེ་ལོང་ཕྱིས་འདྲ་བའི། །དྭངས་མཚོར་གཟུགས་བརྙན་ཅི་ཡང་གསལ། །དངོས་ཀུན་སྟོང་པར་དམིགས་པ་ཡིས།། འཁོར་བའི་གདུང་བ་ཀུན་སེལ་ཏེ། །ཆུ་ཀླུང་མཐའ་དག་ཨ་གསྟྱས། །ཧུབ་ཀྱིས་གཞལ་བས་བདུད་རྩིར་གྱུར། །ཀླུ་སྒྲུབ་བློ་མཚོ་རྒྱ་ཆེ་བས། །དངོས་པོར་སྨྲ་རྣམས་སྤོབས་པ་འཕྲོག །རྔམས་གནག་གཏིང་མཐའ་མི་མངོན་པའི། །རྒྱ་མཚོས་བྱིས་པ་སྐྲག་པར་བྱེད། །ཟབ་མོའི་དེ་ཉིད་འབྱེད་པ་ལ། །ཐོག་མར་དགག་བྱ་ངེས་དགོས་ཏེ། །རྒྱ་མཚོར་ནོར་བུ་ལེན་པ་ལ། །འཇིགས་པ་གར་ཡོད་ཤེས་པ་གཅེས། །གདགས་གཞི་ཕུང་སོགས་འདུས་པ་ལ། །ངའོ་སྙམ་དུ་འཁྲུལ་པ་སྟེ། །ཀླུང་ཆེན་གདོད་ནས་བྲུབས་འདྲ་ཡང༌། །ཆུ་ཕྲན་དུ་མ་འདུས་པ་ཡིན། །བཏགས་དོན་རིགས་པས་དཔྱད་པ་ན། །ངོ་བོས་གྲུབ་པ་འགའ་མེད་དེ། །ཆུ་ཀླུང་ཡུར་བ་བརྒྱར་དྲངས་པའི། །ཤུལ་ན་ཟིལ་བ་ཙམ་ཡང་མེད། །སྟོན་པས་ཇི་སྙེད་བཀའ་སྩལ་པ། །སྟོང་དང་རྟེན་འབྱུང་འདིར་འཇུག་སྟེ། །ས་སྟེང་ཆུ་བོ་མ་ལུས་པ། །རྒྱ་མཚོ་ཆེན་པོར་གཞོལ་ཞིང་འབབ། །རང་རྒྱུད་སྨིན་པའི་རྒྱལ་སྲས་ཀྱིས། །བསྡུ་བ་རྣམ་བཞིས་གདུལ་བྱ་སྐྱོང༌། །རྒྱ་མཚོར་འཇུག་མྱོང་དེད་དཔོན་གྱིས། །གཞན་ཡང་འཁྲིད་ནས་ནོར་ལ་སྦྱོར། །རྒྱུ་ཡི་ཐེག་པའི་ལམ་རིང་ཡང༌། །གསང་སྔགས་ཐབས་ཀྱིས་མྱུར་དུ་བགྲོད། །ཐང་དུ་འདྲེན་དཀའི་གྲུ་བོ་ཆེ། །རྒྱ་མཚོར་ཞུགས་ན་ཡུད་ཀྱིས་འགྲོ། །རྡོ་རྗེ་ཅན་གྱིས་ལེགས་གསུངས་པའི། །གསང་སྔགས་ནུས་པ་བསམ་མི་ཁྱབ༌། །གདུང་བ་མ་ཞེས་བོས་པས་ཀྱང༌། །ལྷ་ཡི་ཆུ་བོ་འགུགས་པར་བྱེད། །ཟུང་འཇུག་གདེངས་ཅན་བདག་པོའི་གནས། །རྡོ་རྗེ་ཐེག་པ་རྒྱ་མཚོ་ཆེའི། །འཇུག་ངོགས་བདེ་བའི་འབབ་སྟེགས་ནི། །དབང་བཞིའི་རིན་ཆེན་ཐེམ་སྐས་ཡིན། །འོན་ཀྱང་དངོས་གྲུབ་རྣམ་གཉིས་ཀྱི། །གཞི་རྟེན་དམ་ཚིག་སྡོམ་པ་སྟེ། །རྩ་བ་ཆུ་མཚོ་སྐམ་གྱུར་ན། །རླབས་ཀྱི་འཕྲེང་བ་གང་ལས་འབྱུང༌། །དེ་ཉིད་རིག་པའི་རྣལ་འབྱོར་པ། །འདོད་ལ་སྤྱོད་ཀྱང་ཞེན་པ་མེད། །ཉ་ནི་ཆུ་གཏིང་ཟབ་མོ་ན། །འགྱུ་ཡང་ཆུ་ཡིས་འཚུབ་མི་འགྱུར། །ཆགས་སོགས་ཉོན་མོངས་ཉེས་པ་རྣམས། །ཉོན་མོངས་ལམ་བྱེད་ཉིད་ཀྱིས་འཇོམས། །རྣ་བར་ཆུ་སོན་ཆུས་འབྱིན་ཞིང༌། །མེས་འཚིག་མེ་ཡིས་བརྡུངས་པས་ཞི། །བསྐྱེད་རིམ་ཕྲ་རགས་རྣལ་འབྱོར་གྱིས། །སྐྱེ་ཤི་བར་དོ་གསུམ་སྦྱོང་སྟེ། །སྐལ་ལྡན་ཤིང་རྟའི་མཆོད་ཡོན་གྱིས། །དུག་ཅན་དྲི་མ་འཁྲུད་པ་བཞིན། །དགའ་བཞིའི་ལྷན་སྐྱེས་བདེ་བ་ཆེས། ། སྟོང་བཞིའི་ཡེ་ཤེས་རྒྱས་འགྱུར་ཏེ། །ཆུ་བོ་རྣམ་བཞིའི་རྒྱུན་འབབ་པས། །རྟ་གདོང་མེ་ཆེན་འབར་བར་འགྱུར། །ཕྲ་བ་གཉུག་མའི་རླུང་སེམས་ལས། །སྒྱུ་མ་ལྟ་བུའི་སྐུར་བཞེངས་པ། །དྭངས་པའི་ཆུ་ལས་ཆུ་བུར་དང༌། །དག་པའི་མཁའ་ལས་ཆུ་འཛིན་བཞིན། །རྩ་རྩེའི་ཟིལ་པ་རེ་རེར་ཡང༌། །ཟླ་བའི་གཟུགས་བརྙན་སྣང་བ་བཞིན། །དཔེ་ཡི་རིམ་པ་རེ་རེས་ཀྱང༌། །འཁོར་འདས་ཆོས་ཀུན་མཚོན་པར་ནུས། །འཇིག་རྟེན་ཡ་རབས་སྤྱོད་པ་ནས། །མདོ་སྔགས་ལམ་གྱི་རིམ་པའི་བར། །དཔེར་བྱ་གཅིག་གིས་མཚོན་པ་འདི། །ལེགས་བཤད་འཕྲུལ་གྱི་རྒྱ་མཚོ་ཡིན། །ལོངས་སྤྱོད་འཁོར་ལོའི་ཆུ་གཏེར་ན། །དབྱངས་ལྡན་ངང་མོ་རྣམ་རོལ་པ། །དེ་ཡི་ཁ་ལས་ལེགས་བཤད་ཀྱི། །རྦ་རླབས་འཁྲི་ཤིང་ཅི་ཡང་གཡོ། །གང་ཡང་བདག་བློའི་ཆུ་གཏེར་ལས་འཁྲུངས་ལེགས་བཤད་གསར་པའི་ཟླ་བ་ནི། །འཇིག་རྟེན་རྨོངས་པའི་མུན་འཕྲོག་སྙིང་གི་གདུང་སེལ་བསིལ་བའི་རེག་པ་ཅན། །དེ་ཡི་དགེ་བ་ས་གསུམ་རྣམ་དཀར་འོད་ཀྱི་གོས་བཟང་འཛིན་པ་དེ། །སྐྱེ་དགུའི་ལེགས་བྱས་བློ་དང་ལྷན་ཅིག་བསྟན་པའི་ཆུ་གཏེར་རྒྱས་གྱུར་ཅིག། །།ཅེས་ལེགས་པར་བཤད་པ་ཆུའི་ཆུ་བསྟན་བཅོས་ལུགས་གཉིས་རླབས་ཕྲེང་བརྒྱ་ལྡན་ཞེས་བྱ་བ་འདི་ནི། སྔར་རང་གི་རྒྱུད་ལ་བག་ཆགས་འཇོག་པའི་ཕྱིར་དུ་རྩོམ་པའི་ཁུལ། དུས་ཚོད་ལ་དཔག་པའི་མདོ་སྔགས་ཀྱི་གཞུང་དུ་བགྲང་རུང་ཙམ་ཁ་ཤས་བྲིས་ཡོད་ནའང༌། ཤིང་གི་བསྟན་བཅོས་དེ་དར་སོ་ཆེ་ཞིང༌། མཐོང་བྱེད་མཁན་མང་དུ་འོང་བར་སྣང་བས་དེ་ལ་འགྲེལ་པ་ཞིག་ཀྱང་བྱུང་ན་ལེགས་ཞེས། པ་རོན་སུ་ཉིད་ཤོག་ནས་བསྔགས་འོས་ཡོན་ཏན་དུ་མའི་རྒྱན་འཕྲེང་འཛིན་པ་ནོམ་ཆི་ཞབས་དྲུང་སྐལ་བཟང་དར་རྒྱས་ཀྱིས་ཡང་ཡང་ནན་གྱིས་བསྐུལ་ཏེ་བྲི་བར་བརྩམ་ཡང༌། དེའི་ཆོས་ཀྱི་སརྒ་ལམ་རིམ་ལས་ལོགས་སུ་མི་དགོས་ལ། གཞན་རྣམས་གོ་སླ་བ་འབའ་ཞིག་གཙོར་འདོན་དང༌། དཔེའང་ཡོངས་གྲགས་མཁས་བླུན་ཐམས་ཅད་ལ་འཆར་བདེ་བ་ཁོ་ནར་སྦྱར་སྟབས་དེ་ལས་གསལ་དུ་གཏོང་རྒྱུ་མེད་པ་ལྟ་བུར་སྣང་ཞིང༌། ཕྱོགས་མཐུན་གྱི་ཁུངས་དཔལ་མགོན་ཀླུ་སྒྲུབ་ཀྱི་ཤེས་རབ་བརྒྱ་པ། ཤེས་རབ་སྡོང་བུ། སྐྱེ་བོ་གསོ་ཐིགས་གསུམ་དང༌། ཙ་ན་ཀ་རྒྱལ་པོའི་ལུགས་ཀྱི་བསྟན་བཅོས། མ་སུ་རཀྵས་བྱས་པའི་ལུགས་ཀྱི་བསྟན་བཅོས། ཉི་མ་སྦས་པས་མཛད་པའི་ཚིགས་སུ་བཅད་པའི་མཛོད། མཆོག་སྲེད་ཀྱི་ཚིགས་བཅད་བརྒྱ་པ། དྲི་མ་མེད་པའི་དྲིས་ལན་རིན་པོ་ཆེའི་ཕྲེང་བ། ས་སྐྱའི་ལེགས་བཤད་རྣམས་དང་གཞན་ཡང་འཕྲིན་ཡིག་བསླབ་བྱ་སོགས་དེ་མཐུན་རྣམས་དྲངས་ཏེ་བཤད་ན་ཚིག་ཚོགས་ཆེས་ལྕི་བར་འགྱུར་བས། འདིར་ལྗོན་ཤིང་ཆུའི་ཁམས་ཀྱིས་རྒྱས་པར་བྱེད་པའི་དཔེ་དང་མཐུན་པར། དེ་ཉིད་དུ་མ་ཚང་བ་འགའ་ཞིག་ཁ་བསྐངས་ནས་ཅུང་ཟད་རྒྱས་སུ་བཏང༌། དེར་མཆོག་དམན་དང་གཙོ་ཕལ་གྱི་རིམ་པས་ཆོས་ཀྱི་སརྒ་སྔོན་དུ་བྱས་ཀྱང༌། འདིར་གོང་ནས་གོང་དུ་བགྲོད་པའི་རིམ་པས་མཇུག་ཏུ་བྱས་ཏེ་གོ་རིམ་བསྡེབས་པ་སོགས་དོན་འགྲེལ་གྱི་ཚུལ་དུ་བྱས་ནས། བཙུན་པ་དཀོན་མཆོག་བསྟན་པའི་སྒྲོན་མེས་དབེན་གནས་ཡིད་དགའ་ཆོས་འཛིན་དུ་སྦྱར་བའོ།། །།
༄༅། །ལེགས་པར་བཤད་པ་ཤིང་གི་བསྟན་བཅོས་
ལུགས་གཉིས་ཡལ་འདབ་བརྒྱ་
ལྡན་ཞེས་བྱ་བ་བཞུགས་
སོ།།
ཤིང་གི་བསྟན་བཅོས་ལས་ཆོས་ཀྱི་སརྒ།
༄༅། །ཨོཾ་བདེ་ལེགས་སུ་གྱུར་ཅིག །རིན་ཆེན་སེམས་ཀྱི་རྩ་བ་བརྟན། །རླབས་ཆེན་ཚོགས་གཉིས་ཡལ་ག་རྒྱས། །སྐུ་གསུམ་འབྲས་བཟང་སྙེ་མས་དུད། །སངས་རྒྱས་ལྗོན་པ་དེ་ལ་འདུད། །སྣང་བ་དཔེ་རུ་ཤར་བ་ཡི། །རྣལ་འབྱོར་དེ་ལ་གདམས་ངག་མང༌། །ནགས་ཀླུང་སྟུག་པོའི་དོ་ར་རུ། །ཤིང་ལོའི་ཕུང་པོ་ཟད་པ་མེད། །དཔག་བསམ་ཤིང་ལ་བརྟེན་བྱས་ན། །དགོས་འདོད་ཐམས་ཅད་ཆར་དུ་བསྙིལ། །དེ་བཞིན་བཤེས་གཉེན་དམ་པ་ལ། །བརྟེན་ན་ལེགས་ཚོགས་ལྷུན་གྱིས་འགྲུབ། །བཤེས་ལ་མི་གུས་སྐྱེ་བོ་དེས། །གཞུང་བརྒྱ་ཤེས་ཀྱང་དོན་མི་འགྱུར། །ཤིང་སྐམ་ལོ་བརྒྱར་ཆུར་འཕངས་ཀྱང༌། །ལོ་འདབ་སྐྱེ་བ་སྲིད་ན་མེད། །དད་ལྡན་རང་བཞིན་བཟང་པོ་དེར། །ཚིགས་བཅད་གཅིག་ཙམ་གྱིས་ཀྱང་ཕན། །རྐང་འཐུང་གསར་པའི་མྱུར་གུ་དེ། །ཆུ་ཆར་གཟེགས་མ་ཡིས་ཀྱང་འཕེལ། །ཚེར་མ་ཅན་དང་དུག་ཤིང་གིས། །མི་དགོས་བཞིན་དུ་ས་འདི་གང༌། །མི་ཁོམ་ངན་སོང་སྐྱེ་བ་ནི། །ས་ཡི་རྡུལ་བཞིན་བགྲང་ལས་འདས། །ཙན་དན་ས་མཆོག་ལྗོན་པ་དེ། །འཇིག་རྟེན་འདི་ན་སྲིད་པ་ཙམ། །དལ་འབྱོར་ཚང་བའི་རྟེན་བཟང་ཡང༌། །བརྒྱ་ལམ་ཐོབ་པ་མ་བཀག་ཙམ། །དལ་འབྱོར་སྙིང་པོ་མ་བླང་ན། །དུད་འགྲོའི་རྟེན་དང་གཉིས་སུ་མེད། །ཨ་མྲའི་འབྲས་བུ་མི་སྤྱོད་ན། །ཨེ་རཎྜ་དང་ཁྱད་པར་ཅི། །མདངས་དང་ལོ་འབྲས་མེ་ཏོག་སོགས། །ལྗོན་པ་གཅིག་ཀྱང་དུས་ཀྱིས་འགྱུར། །སྐྱེ་རྒ་ན་དང་འཆི་བ་ཡི། །ཟློས་གར་སྐད་ཅིག་སྐད་ཅིག་བསྒྱུར། །རིང་དུ་འབྲེལ་བའི་ཤིང་ལོ་དེ། །ལན་གཅིག་བྲུལ་བ་སླར་མི་འབྱོར། །མཛའ་བ་ཡུན་རིང་འཁོད་འཁོད་ནས། །ནམ་ཞིག་གཏན་དུ་འབྲལ་བར་འགྱུར། །སྡོང་པོ་གཤགས་གཏུབ་དྲས་པ་ཡིས། །ཤིང་མཁན་མྱུར་དུ་ངལ་བར་འགྱུར། །བསྐལ་པར་དེ་འདྲའི་ལས་བསྒྲུབས་ཀྱང༌། །དམྱལ་སྲུང་རྣམས་ནི་ངལ་བ་མེད། །ཇི་སྲིད་མི་དགེ་མ་ཟད་པ། །དེ་སྲིད་སྡུག་བསྔལ་ཁོར་མོར་མྱོང༌། །དུག་གི་ས་བོན་གནས་ཀྱི་བར། །དུག་ལོ་སྐྱེ་བ་ཆོས་ཉིད་ཡིན། །གང་ཞིག་གསུམ་ལ་སྐྱབས་སོང་བ། །དེ་ལ་སྲིད་ཞིའི་རྒུད་པ་མེད། །ལྗོན་པ་ཆེ་ལ་བརྟེན་པ་དེར། །གཅན་གཟན་གདུག་པས་གཙེ་མི་ནུས། །རྩ་བ་རུལ་བའི་ལྗོན་པ་ལ། །རྟེན་པར་བྱེད་པ་བླུན་པོའི་རྟགས། །རང་ཡང་འཁོར་བར་བྱིང་བ་ལ། །སྐྱབས་སུ་འཛིན་རྣམས་ཀྱེ་མ་འཁྲུལ། །དུག་དང་སྨན་གྱི་མྱུ་གུ་ལས། །འབྲས་བུ་འཆོལ་བ་འགར་ཡང་མེད། །དགེ་དང་མི་དགེ་ལས་ལས་ཀྱང༌། །འབྲས་བུ་གཞན་འབྱུང་གནས་མ་ཡིན། །ཐོག་མེད་དུས་ནས་བསགས་པའི་ལས། །བསྐལ་པ་བརྒྱར་ཡང་ཆུད་མི་ཟ། །ཏ་ལའི་ཤིང་འབྲས་སྟོང་ཕྲག་ལོར། །བསྐམས་ཀྱང་རླན་དང་འཕྲད་ན་སྐྱེ། །ས་བོན་ཆུང་སྨིན་ནྱ་གྲོ་དྷའི། །ཡལ་འདབ་རྒྱས་པས་རྒྱང་གྲགས་ཁེབས། །ཁམ་གཅིག་ཟས་ཀྱི་སྦྱིན་པས་ཀྱང༌། །འབྲས་བུ་འཁོར་ལོས་སྒྱུར་བ་འཐོབ། །རྣམ་བཀྲ་སྲིད་པའི་འཁོར་ལོ་འདིར། །དོན་ལྡན་སྙིང་པོ་འགའ་མ་མཆིས། །ཆུ་ཤིང་རློན་པའི་སྡོང་པོ་ལ། །རྩེ་གཏིང་ཀུན་ན་སྙིང་པོ་མེད། །ལྗོན་ཤིང་ལོ་བརྒྱར་སྐྱེས་པ་ཡང༌། །ནམ་ཞིག་ཚེ་ན་འགྱེལ་བར་འགྱུར། །སྲིད་པའི་རྩེ་མོར་ཕྱིན་ནས་ནི། །སླར་ཡང་མི་བཟད་ངན་འགྲོར་འགྲོ། །བུར་ཤིང་ཁུ་བས་རབ་བསྒོས་ན། །ཏིག་ཏའི་ཁ་བ་སེལ་བར་ནུས། །ལམ་གྱི་བདེན་པ་རབ་གོམས་པས། །སྡུག་བསྔལ་རྩ་བ་ཀུན་འབྱུང་སྤོང༌། །ཀ་གདུང་ལྕམ་དང་དྲལ་མ་རྣམས། །ཚོགས་པས་ཡིད་འོང་ལྡིང་ཁང་སྟེ། །ལྷག་པའི་བསླབ་པ་གསུམ་ཚོགས་པས། །ཐར་པ་དམ་པའི་ཁང་བཟང་འགྲུབ། །ཛན་དུའི་ས་བོན་དེའི་ས་བོན། །གཞན་ལས་སྐྱེ་ཕྱིར་ཐོག་མ་མེད། །མཐའ་མེད་འཁོར་བར་སྐྱེས་པ་ན། །ཕ་མར་མ་གྱུར་སུ་ཞིག་ཡོད། །རྟ་གླང་བརྒྱ་ཡི་ཁུར་ལྕི་བ། །ཤིང་རྟ་ཆེན་པོ་གཅིག་གིས་འདྲེན། །ཉན་རང་ཀུན་གྱིས་མ་ལོངས་པའི། །ཁུར་དེ་རྒྱལ་སྲས་ཕྲག་ན་མཛེས། །ཤིང་གཞན་འབྲས་བུ་བླངས་པས་འཛད། །དཔག་བསམ་ཤིང་འབྲས་ཟད་པ་མེད། །དགེ་བ་གཞན་འབྲས་སྤྱད་པས་འཛད། །བྱང་ཆུབ་སེམས་དགེ་ཕྱིར་ཞིང་འཕེལ། །ཡོངས་སྨིན་འབྲས་བུས་སྤ་བ་ཡི། །རྐང་འཐུང་དེ་ལ་སྐྱེ་བོ་འདུ། །འཇུངས་མེད་གཏོང་བའི་དཔལ་ཡོན་ཅན། །དེ་ཡིས་སྐྱེ་དགུའི་རེ་བ་སྐོང༌། །མངོན་པར་མཐོ་དང་ངེས་ལེགས་ཀྱི། །རྩ་བ་ཚུལ་ཁྲིམས་ལས་གཞན་མེད། །ཡལ་འདབ་གཡུར་དུ་ཟ་བ་ཡི། །རྩ་བ་སྡོང་བུ་ཉག་ཅིག་ཡིན། །ཚེར་མ་ཟུག་པའི་ལན་དུ་སླར། །ཁུ་ཚུར་བརྡེག་པ་བཞད་གད་རྒྱུ། །གནོད་བྱེད་ལ་ཡང་སླར་ཁྲོ་བ། །རང་ཉིད་ཉམས་པའི་རྒྱུ་རུ་ཟད། །རྒྱུ་དུས་བརྩོན་པ་མ་བཏང་ན། །འབྲས་དུས་ཡོན་ཏན་ཐམས་ཅད་སྐྱེ། །རྩ་བ་རླན་དང་མ་བྲལ་ན། །རྩེ་མོར་ལོ་འབྲས་སྨིན་པར་འགྱུར། །སྡོང་པོ་རླུང་གིས་ཆེར་བསྐྱོད་ན། །འབྲས་བུ་ས་ལ་འབྲུལ་བ་ལྟར། །བྱིང་རྒོད་གཡེང་བས་རབ་གཡོས་པས། །ཏིང་འཛིན་དམིགས་པ་སྟོར་བར་བྱེད། །བསམ་གཏན་རྣམ་པར་དག་པ་ལས། །མངོན་ཤེས་ལ་སོགས་ཡོན་ཏན་འབྱུང༌། །སྡོང་བུ་ཉམས་པ་མེད་གྱུར་ན། །མེ་ཏོག་གེ་སར་མགོ་ལྕོག་ལྡེམ། །ཤིང་གི་རལ་གྲི་གཡུལ་གྱི་ངོར། །འཕྱར་བ་དགྲ་ཡི་དགའ་སྟོན་ཡིན། །ལྟར་སྣང་ཉི་ཚེའི་ལྟ་བ་ཡིས། །སྲིད་རྩ་གཅོད་འདོད་ཀྱེ་ཧུད་མཚར། །ཧ་རི་ཙན་དན་བཟང་པོ་ཡིས། །ལུས་ཀྱི་ཚ་གདུང་སེལ་བར་བྱེད། །སྙིང་རྗེའི་བཅུད་ལྡན་ལྟ་བ་ཡིས། །དུག་གསུམ་ནད་བརྒྱ་དྲུངས་ནས་འབྱིན། །ཤིང་ལས་སྐྱེས་པའི་སྲིན་བུ་ཡིས། །ཤིང་དེ་ཟད་པར་བྱེད་པ་བཞིན། །འདོད་ཆགས་ལས་སྐྱེས་ཡེ་ཤེས་ཀྱིས། །འདོད་ཆགས་ཉེས་པ་ཞི་བར་བྱེད། །ཤིང་སྐྱ་རླན་གྱིས་ཟིན་པ་ལས། །བཻཌཱུར་མདངས་སུ་འཕོ་བ་ལྟར། །ཐ་མལ་སྣང་བ་འོད་གསལ་གྱིས། །སྦྱངས་ཏེ་དག་པའི་ལྷ་སྐུར་ལྡང༌། །ཡལ་འདབ་ཡོངས་སུ་རྫོགས་པ་ཡི། །ལྗོན་པའི་གྲིབ་མ་ཀུན་ཏུ་བསིལ། །ཡོན་ཏན་མ་ལུས་རྫོགས་པ་ཡི། །རྒྱལ་བ་སྐྱེ་དགུའི་མགོན་དུ་གྱུར། །དེ་ལྟར་ཤིང་གི་བསྟན་བཅོས་ལས། །ཆོས་ཀྱི་ལམ་བསྟན་སརྒ་སྟེ། །ད་ནི་འཇིག་རྟེན་ཚུལ་ལུགས་འགའ། །བཤད་དོ་རྣ་བ་བླགས་ཏེ་ཉོན། །
འཇིག་རྟེན་ལུགས་ཀྱི་སརྒ།
༄༅། །ཆོས་ལྡན་རྒྱལ་པོའི་གཟི་བྱིན་གྱིས། །དགྲ་སྡེ་རྣམས་ཀྱང་དབང་དུ་འདུ། །མ་ལ་ཡར་སྐྱེས་དྲི་བསུང་དེ། །བུང་བ་འགུགས་པའི་ཕོ་ཉ་ཡིན། །རྒྱལ་ངན་ཆབ་འབངས་གཟིར་བ་དེར། །ནམ་ཞིག་གཡོག་ཀྱང་འཁོར་མི་འགྱུར། །སྲན་ཕུང་དབྱུག་པས་གཏོར་ན་ཡང༌། །དབྱུག་པའི་ངོས་ལ་འབྱར་མི་སྲིད། །བློན་དང་འབངས་ཀྱིས་མ་བཀུར་ན། །རྒྱལ་པོ་ཆེན་པོ་ཇི་ལྟར་གནས། །གདུང་མ་ཀ་བས་མ་བཏེག་ན། །རྒྱལ་པོའི་ཕོ་བྲང་གང་ལས་འབྱུང༌། །རྗེ་དཔོན་བཟང་པོའི་བཀའ་དྲིན་གྱིས། །གཡོག་འཁོར་མངའ་ཐང་དར་བར་འགྱུར། །ལྗོན་པ་ཆེ་ལ་བརྟེན་པ་ཡི། །འཁྲི་ཤིང་རྩེ་མོ་དགུང་ལ་བསྙེགས། །ཚེར་མའི་ཤིང་ལ་བརྟེན་བྱས་ན། །གནད་དུ་ཟུག་པའི་སྡུག་བསྔལ་སྐྱེ། །སྐྱེ་བོ་ངན་ལ་བརྟེན་བྱས་ཀྱང༌། །ཕྱི་ཕྱིར་སྡུག་བསྔལ་འབའ་ཞིག་བསྐྱེད། །ཆབ་འབངས་བདེ་སྐྱིད་རྒྱས་པ་དེ། །རྗེ་དཔོན་ཉིད་ཀྱི་ཆེ་བའི་རྟགས། །རབ་རྒྱས་ཡལ་གའི་ཁྱོན་ཡངས་པ། །སྡོང་པོ་རྩ་བའི་མཛེས་རྒྱན་ཡིན། །གཡོག་འཁོར་རྒུད་པའི་སྡེ་དཔོན་དེ། །རང་ཉིད་འབྱོར་ཡང་ངོ་ཚའི་རྒྱུ། །སྡོང་པོ་ཅི་ཙམ་སྦོམ་ན་ཡང༌། །ཡལ་འདབ་མེད་ན་གཅེར་བུ་ཡིན། །སྡོང་རུལ་རྩ་བར་གནས་པའི་མི། །ཉིན་མཚན་ཀུན་ཏུ་བག་ཕེབས་བྲལ། །གཙོ་བོ་ངན་པའི་གཡོག་འཁོར་ཡང༌། །རྟག་ཏུ་སེམས་ཁྲལ་གདུང་བས་གཟིར། །དཔོན་ངན་གཡོག་འཁོར་འབྲོས་ན་ཡང༌། །སྡེ་དཔོན་བཟང་པོས་བསྐྲད་ཀྱང་འདུ། །ཚེར་ཤིང་འབོར་བའི་བྷྲ་མ་ར། །ཙཱུ་ཏའི་ཤིང་ལས་བསྐྲད་ཀྱང་འཁོར། །རྗེ་དཔོན་གསར་ཚེ་བྱམས་བྱེད་ཀྱང༌། །ཕྱི་ནས་བསྒྲུབ་དཀའི་དཔྱ་ཁྲལ་འབེབས། །ཤིང་ལ་ཆར་སྐྱོབ་བྱེད་མོད་ཀྱང༌། །རྗེས་སུ་ཐིགས་འཕྲེང་ལྕི་བར་འབབ། །ལྗོན་པའི་གྲིབ་བསིལ་ཀུན་ལ་སྙོམས། །ཉི་ཟླའི་སྣང་བ་ཀུན་ལ་སྙོམས། །སྤྲིན་གྱི་ཆུ་ཆར་ཀུན་ལ་སྙོམས། །རྒྱལ་པོའི་བཀའ་ཁྲིམས་ཀུན་ལ་སྙོམས། །གཙོ་བོ་བཟང་ཡང་འཁོར་ངན་ན། །དེ་ཡི་དྲུང་དུ་བསྙེན་པར་དཀའ། །གདུག་པའི་སྦྲུལ་གྱིས་དཀྲིས་པ་ཡི། །ཙན་དན་ལྗོན་པ་སུ་ཡིས་སྟེན། །ཕྱི་ནང་སྨིན་དང་མ་སྨིན་པའི། །ཨ་མྲའི་འབྲས་བུ་རིགས་བཞིར་གསུངས། །མི་ཡང་སེམས་དང་སྤྱོད་པ་གཉིས། །དག་དང་མ་དག་དབྱེ་བ་མང༌། །མཁས་པ་ཡོན་ཏན་ཀུན་ལྡན་དེ། །རློམ་སེམས་མེད་པར་ཞི་ཞིང་དུལ། །སྙེ་མའི་ཁུར་གྱིས་ལྗིད་པ་ཡི། །ལྗོན་ཤིང་རྩེ་མོ་དུད་དེ་གནས། །ཡོན་ཏན་མེད་པའི་སྐྱེ་བོ་དེ། །ང་རྒྱལ་མགོ་འཕང་ཅི་ལས་མཐོ། །འབྲས་བུའི་བཅུད་ཀྱིས་མ་བཟུང་བའི། །ལྗོན་པ་རེངས་པ་ཆོས་ཉིད་ཡིན། །ལྷན་སྐྱེས་ཡོན་ཏན་མེད་གྱུར་ན། །ཕྱི་ཚུལ་བཅོས་པས་ཅི་ལ་ཕན། །ཡལ་འདབ་མེད་པའི་ཤིང་སྐམ་དེར། །ཅོད་པན་བཏགས་ཀྱང་ག་ལ་མཛེས། །བསླབ་སྦྱང་དུས་ན་གཡེལ་བ་དེས། །མཁས་འདོད་རེ་བ་འབྲས་མེད་ཡིན། །མེ་ཏོག་སད་ཀྱིས་ཁྱེར་བ་ཡི། །ཤིང་ལ་འབྲས་བུའི་རེ་བ་མེད། །བློ་གྲོས་རྩལ་དང་མི་ལྡན་ན། །གོ་ས་མཐོ་ཡང་ཁྲེལ་བའི་གཞི། ། ཤིང་ལས་བྱས་པའི་སེངྒེ་དེ། །འཇིགས་འཇིགས་འདྲ་ཡང་སྙིང་པོ་མེད། །དྲི་ཞིམ་བསུང་དང་མི་ལྡན་ན། །ཙན་དན་ཡིན་ཞེས་སྨྲས་ཀྱང་རྫུན། །དམ་པའི་ཚུལ་དང་མི་མཐུན་ན། །དམ་པར་ཁས་འཆེ་དོན་དང་བྲལ། །དམན་པ་རྒྱལ་སར་བཏོན་ན་ཡང༌། །མ་རབས་སྤྱོད་པའི་རྗེས་སུ་འཇུག །ཆུ་ཤིང་གྱེན་དུ་སྐྱེས་ན་ཡང༌། །འདབ་མ་ཐུར་དུ་འཕྱང་བར་འགྱུར། །ཨ་གར་དུམ་བུ་བརྒྱར་གཏུབས་ཀྱང༌། །ལྷན་སྐྱེས་དྲི་བཟང་མི་གཏོང་ལྟར། །དམ་པ་ཅི་ཙམ་རྒུད་ན་ཡང༌། །བཟང་པོའི་རང་བཞིན་ག་ལ་འདོར། །ཤུག་པའི་ལོ་མ་མེར་བཅུག་ན། །ལྷག་པར་དྲི་ཞིམ་རྒྱས་པ་བཞིན། །དམ་པ་རྣམས་ལ་གནོད་བྱས་པས། །ཕྱིར་ཞིང་དེ་ཡི་ཆེ་བ་འདོན། །དམ་པ་དབེན་པར་གནས་ན་ཡང༌། །གྲགས་སྙན་ལྷ་ཡིས་སྒྲོག་པར་བྱེད། །ལྷོ་ཡི་རི་ལས་སྐྱེས་པ་ཡི། །ཙན་དན་དྲི་བསུང་རླུང་གིས་འགྱེད། །འཁྱོག་པའི་ཤིང་དེ་བསྲངས་ན་ཡང༌། །རླན་དང་འཕྲད་ཚེ་ཡ་ཡོར་འགྱུར། །རང་བཞིན་ངན་པ་བཅོས་ན་ཡང༌། །རྐྱེན་དང་འཕྲད་ཚེ་རང་མཚང་སྟོན། །ཀླད་ཆུང་རང་བཞིན་ངན་པ་ལ། །ཡོན་ཏན་ཡོད་ཀྱང་ཕན་མི་ཐོགས། །རྩ་བ་དུག་ཏུ་གནས་པ་ཡི། །མེ་ཏོག་མཛེས་ཀྱང་སུ་ལ་མཁོ། །ཙན་དན་ཤུག་པའི་ཀ་བ་གཉིས། །གདུང་མ་འདེགས་པའི་ནུས་པ་མཚུངས། །སྙིང་སྟོབས་ལྡན་ན་དབུལ་ཕྱུག་གཉིས། །བྱ་བ་བྱེད་པའི་དུས་སུ་འདྲ། །ལོངས་སྤྱོད་མངའ་ཐང་མཉམ་ན་ཡང༌། །བཟང་ངན་ལས་ལ་སྦྱར་ན་ཤེས། །ཕྲ་སྦོམ་མཉམ་ཡང་ཆུར་འཕངས་ན། །ཤིང་གི་མགོ་མཇུག་ཤེས་པར་ནུས། །མཁས་པའི་སྐྱེ་བོ་ཡུལ་གཞན་དུ། །བྲིན་ཞིང་ཀུན་གྱིས་བཀུར་བར་འགྱུར། །ནགས་སུ་སྐྱེས་པའི་ཤིང་གིས་ནི། །གཞན་དུ་ཤིང་གི་བྱ་བ་བྱེད། །ཤིང་བལ་རླུང་གིས་བདས་པ་དེ། །རི་རྩེར་མི་སྡོད་གཤོང་དུ་ཆགས། །བློ་ཆུང་ཕྱོགས་མཐར་འཁྱམས་འཁྱམས་ནས། །མཐའ་མར་རྒུད་པའི་གནས་སུ་ལྷུང༌། །སྐྱོན་གྱིས་གོས་པ་ཆེས་སླ་སྟེ། །ཡོན་ཏན་སློབ་པ་དེ་ལྟ་མིན། །ཤིང་ལ་མེ་ལྕེ་མཆེད་སླ་ཡང༌། །ཆུ་བོ་སོ་སོར་འགྱེས་པ་དཀའ། །མ་རབས་སྐྱེ་བོ་གཉིས་འགྲོགས་ན། །ཕུགས་སུ་རང་གཞན་གཉིས་ཀ་འཕུང༌། །གཙུབ་ཤིང་ཟུང་དུ་བརྡར་བ་ཡིས། །མཇུག་ཏུ་གཉིས་ཀ་སྲེག་པར་བྱེད། །ཕུན་སུམ་ཚོགས་པའི་ལྗོན་པ་ཡང༌། །ཆུ་དང་འགྲོགས་ན་རྩ་བ་འབྱིན། །ཡ་རབས་ཡོན་ཏན་ལྡན་པ་ཡང༌། །གྲོགས་པོ་ངན་པས་ཉམས་པར་བྱེད། །འབྲས་ལྡན་ཤིང་གཉིས་སྦྱར་བ་ལས། །འབྲས་བུ་ཕུང་གསུམ་འབྱུང་བ་ལྟར། །བློ་དང་ལྡན་པ་གཉིས་འགྲོགས་ན། །སྔོན་མེད་ལེགས་པའི་བློ་གྲོས་སྐྱེ། །ལྗོན་པའི་གྲིབ་བསིལ་བསྟེན་པ་ཡི། །གླང་པོས་ཤིང་གི་རྩ་བ་འབྱིན། །གཡོག་འཁོར་ངན་པ་བསྟེན་པ་ཡིས། །ལེགས་བྱས་རྩ་བ་ཉམས་པར་བྱེད། །ཤིང་སྡོང་གཙུག་གིས་བཀུར་བ་ཡི། །འདབ་ཆགས་འགྲོ་ཚེ་བྱ་ཐལ་གཏོང༌། །ཟླ་གྲོགས་ངན་པ་བསྟེན་ན་ཡང༌། །ནམ་ཞིག་རྗེས་ངན་བཞག་ནས་འགྲོ། །ངན་པར་ཅི་ཙམ་ཕན་བཏགས་ཀྱང༌། །ལན་དུ་ཕན་པའི་རེ་བ་མེད། །ཤིང་གིས་རྟག་ཏུ་མེ་གསོས་ཀྱང༌། །མེ་ཡིས་དེ་ཉིད་ཐལ་བར་བྱེད། །བློ་དང་མཐུ་ལྡན་རེ་རེས་ཀྱང༌། །མཆོག་དམན་ཀུན་གྱི་དགོས་པ་བསྒྲུབ། །འོད་མའི་གནམ་རུ་གཅིག་གིས་ཀྱང༌། །ཉན་ཕྲག་སྟོང་གི་བྱ་བ་བྱེད། །ལོངས་སྤྱོད་དཔལ་དང་མི་ལྡན་ན། །རིགས་རུས་མཐོ་ཡང་དགོས་པ་ཆུང༌། །དགོས་པའི་གྲིབ་བསིལ་མེད་གྱུར་ཚེ། །རྩེ་མོ་མཐོ་བས་ཅི་ལ་ཕན། །རྩ་བ་བསོད་ནམས་མེད་གྱུར་ན། །བསགས་པས་དབུལ་བ་མི་སེལ་ཏེ། །སྡོང་པོ་རླན་དང་བྲལ་བ་ལ། །ཡལ་གར་ཆུ་ཡིས་བྱུགས་ཀྱང་ཅི། །བུན་དང་བསྐྱེད་ཀྱིས་ནོར་སྤེལ་བར། །འདོད་ཀྱང་རྩ་བ་སྟོར་བ་མང༌། །ཤིང་སྐྱེས་བཅད་ནས་ས་གཞན་དུ། །བཙུགས་པ་ཕལ་ཆེར་སྐམ་པར་འགྱུར། །གཡང་ས་མཐོན་པོར་སྐྱེས་པ་ཡི། །ས་ཧ་ཀཱ་རའི་འབྲས་བུ་བཞིན། །རང་གཞན་སུ་ལའང་མི་ཕན་པའི། །ལོངས་སྤྱོད་ཆེ་དེ་སྦ་བ་ཡིན། །ལོངས་སྤྱོད་སྤེལ་བར་འདོད་པ་ཡིས། །ཆ་ཤས་གཏོང་བ་མན་ངག་སྟེ། །ལྗོན་ཤིང་ཡལ་ག་རྒྱས་འདོད་ན། །རྩེ་མོ་འདྲེག་པ་ཐབས་སུ་བཟང༌། །དམན་པས་བསགས་ཀྱང་མི་འགྲུབ་ལ། །བསོད་ནམས་ལྡན་པས་བཏང་ཡང་འབྱོར། །རླན་སར་བཅད་ཀྱང་སྐྱེ་བའི་ཤིང༌། །སྐམ་སར་བཙུགས་ཀྱང་ག་ལ་སྐྱེ། །ལམ་ཁའི་ཤིང་གི་འབྲས་བུ་དེ། །བྱིས་པའི་རྡོ་ཆར་འབེབས་པའི་རྒྱུ། །བདག་པོ་ངན་པའི་ལོངས་སྤྱོད་ཀྱང༌། །ཕལ་ཆེར་དགྲ་ཡི་གཡབ་མོ་ཡིན། །བསོད་ནམས་དམན་པའི་སྐྱེས་བུ་དེར། །དཔལ་འབྱོར་བྱུང་ན་སྲོག་ཀྱང་བརླག །སྨྱིག་མའི་ཤིང་གི་རྩེ་མོ་ལ། །འབྲས་བུ་ཆགས་པ་ཉམས་པའི་ལྟས། །བུར་ཤིང་གཅོད་པ་རོ་ཡི་ཕྱིར། །ཝ་སྐྱེས་གསོད་པ་པགས་པའི་སླད། །དོན་མཐུན་འཇོམས་པ་ནོར་གྱི་དོན། །རྒྱལ་པོར་རྒོལ་བ་འབངས་ཀྱི་ཆེད། །ཤིང་ལ་ཐོག་མར་ཐིག་འདེབས་ཀྱི། །དྲས་ཤིང་གཏུབས་ནས་བསྒྱུར་དུ་མེད། །བྱ་བའི་ཐོག་མར་བསམ་དགོས་ཀྱི། །རྗེས་ནས་གྱོད་བརྡལ་བླུན་པོའི་རྟགས། །སྟབས་ལེགས་ཙམ་གྱིས་དོན་གྲུབ་ཀྱང༌། །བློ་དང་ལྡན་པ་སུ་ཞིག་རློམ། །ལོ་མ་འཁུམས་ནས་ཉལ་བའི་ཤིང༌། །སེམས་ལྡན་བསྒྲུབས་པ་མུ་སྟེགས་ལུགས། །སྲང་མདོར་ལོ་འདབ་ཉལ་ཉིལ་དུ། །གནས་པའི་ཤིང་དེ་ཀུན་གྱིས་བརྫི། །དོན་མེད་འཆོལ་བའི་གཏམ་མང་བའི། །མི་དེ་ཀུན་ལ་ངོ་ཐང་ཆུང༌། །མི་ངན་བྱས་པ་ཆུང་ན་ཡང༌། །དྲིན་ཆེའི་ཡུས་ཀྱིས་རྣ་བ་འགེངས། །བུད་ཤིང་རློན་པ་མེ་ཆུང་ཡང༌། །དུད་པ་ནག་པོས་ཚང་མང་འགེངས། །ཤིང་ལ་ལན་ཅིག་སྦྲུལ་གནས་དེ། །ཕྱིས་ཀྱང་མཐོང་ཚེ་འཇིགས་པ་ལྟར། །རྐུ་དང་རྫུན་ལ་གཅིག་ཞུགས་པའི། །མི་དེར་རྟག་ཏུ་དོགས་པ་སྐྱེ། །ཚེར་མ་རྣོ་ཡང་བྲག་རི་ལ། །བསྣུན་ན་རྩེ་མོ་འཇིལ་བར་བྱེད། །སྐྱེས་བུ་དམ་པར་ཕྲག་དོག་གིས། །སྨོད་པ་རང་གི་དམའ་འབེབས་ཡིན། །གནས་མིན་ལ་ཡང་དུལ་ཆེས་ན། །སྙིགས་མའི་དུས་འདིར་ཀུན་གྱིས་བརྙས། །ཤིང་བལ་འཇམ་མོ་འཇམ་མོ་ཞེས། །ཀུན་གྱིས་སྟན་དུ་མི་བྱེད་དམ། །ཤིང་སྐྱེས་དྲང་པོ་མཛེས་ན་ཡང༌། །སྒ་ཤིང་འཁྱོག་པོ་ཅི་ལས་བཟང༌། །རང་བཞིན་དྲང་ན་བཟང་མོད་ཀྱང༌། །རེས་འགའ་ལྡེམ་པོར་རྒྱལ་བས་གསུངས། །མདེའུ་མེད་པའི་མདའ་འཕེན་པ། །དགྲ་བོ་སྤྱན་འདྲེན་ཕོ་ཉ་ཡིན། །དགྲ་བོ་འཇོམས་པའི་མཐུ་མེད་ན། །དོན་མེད་དཔའ་སྐད་ཅི་ལ་སྨྲ། །གཉེན་ལ་ཧ་ཅང་བྱམས་པ་ཡང༌། །འཁོན་གྱི་རྒྱུ་རུ་འགྲོ་བ་མང༌། །བུར་ཤིང་མངར་པོ་སྤྱོད་ཆེས་ན། །མ་ཞུས་སྒྲེགས་པ་སྐྱུར་མོ་འབྱུང༌། །ཤིང་དགྲ་སྟ་རེ་ཡིན་མོད་ཀྱང༌། །དེ་ཡི་ཡུ་བ་ཤིང་གིས་བྱེད། །དགྲ་ཡིས་བརྩམས་པའི་ཕུང་ཀྲོལ་ཀྱང༌། །ཕལ་ཆེར་རྩ་བ་གཉེན་གྱིས་བྱེད། །སྡོང་པོ་གཅོད་པའི་ཐབས་ཉེས་ན། །རང་གི་སྟེང་དུ་ལྷུང་བར་འགྱུར། །དགྲ་ལ་ཧ་ཅང་སྡང་བ་ཡང༌། །རང་གི་གཤེད་དུ་འགྲོ་བ་མང༌། །ཤིང་སྐམ་དགུག་པར་མི་ནུས་དེ། །རླན་གྱིས་བསྒོས་ན་ལས་སུ་རུང༌། །དགྲ་བོ་མི་བསྲུན་སེམས་ལྡན་ཡང༌། །ཐབས་ལ་མཁས་ན་འདུལ་བར་ནུས། །ཉི་ཟླས་མི་ཕྱེད་མྱ་ངན་མེད། །ན་ཆུང་རྐང་གདུབ་རེག་པས་འབྱེད། །ལེགས་པར་བཤད་ཀྱང་མི་གོ་བའི། །མ་རབས་ལ་ལ་སྨད་པས་ཐུལ། །ནགས་ན་གནས་རྣམས་ཁང་བཟང་དང༌། །དེར་གནས་སྐྱེད་མོས་ཚལ་ལ་དགའ། །འཚོ་བས་དབུལ་བ་རབ་བྱུང་དང༌། །རྒྱགས་པས་མྱོས་པ་ཁྱིམ་ལ་ཕྱོགས། །ནགས་དེར་སྐྱེས་པའི་སྤྲེའུ་ཡང༌། །འབྲས་བུ་ཟད་ན་གཞན་དུ་འགྲོ། །རྒུད་ཚེ་སྙིང་དུ་སྡུག་པ་ཡི། །བུ་ཡང་གཞན་གྱི་ཕྱོགས་སུ་འབྲོས། །ནགས་ཚལ་ཕུན་སུམ་ཚོགས་པ་དེར། །དོན་མེད་ནམ་མཁའི་བྱ་ཡང་འཁོར། །གང་ན་བདེ་སྐྱིད་འཛོམས་པ་དེར། །མ་བསྡུས་པར་ཡང་སྐྱེ་བོ་འདུ། །ཤིང་གི་འབྲས་བུ་ལེགས་བསྐྱངས་ན། །ལོ་འདབ་ལ་སོགས་ཞར་ལ་འབྱུང༌། །དམ་པའི་ཆོས་ལ་བརྩོན་བྱས་ན། །སྲིད་ཀྱི་དཔལ་ཡང་དེ་ཡིས་འགྲུབ། །དེ་ལྟར་ལུགས་གཉིས་བླང་དོར་ཀུན། །ཤིང་གི་ཁྱད་པར་ཁོ་ན་ཡིས། །མཚོན་བྱེད་གཏམ་གྱི་སྦྱོར་བ་འདི། །སྔོན་མེད་མཁས་པའི་དགའ་སྟོན་ཡིན། །གང་མགྲིན་འོ་མའི་རྒྱ་མཚོ་རུ། །དབྱངས་ལྡན་ངང་མོ་རྣམ་རོལ་པ། །དེ་ཡི་ཁ་ལས་ལེགས་བཤད་ཀྱི། །རྦ་རླབས་འཁྲི་ཤིང་ཅི་ཡང་གཡོ། །གྲགས་སྙན་ནོར་བུའི་ཞགས་པ་ཡིས། །རྒྱ་བོད་འཛིན་མའི་མཐའ་བཅིངས་པ། །དཔལ་ལྡན་ས་སྐྱ་པཎྜི་ཏའི། །ལེགས་བཤད་ལམ་ལ་བརྟེན་པ་ཡིན། །དོན་གྱི་སྒོ་ལྕགས་མཁྱིད་གང་ལ། །དཔེ་ཡི་ལྡེ་མིག་ཁྲུ་གང་པ། །དེ་ལྟའི་གཞུང་ཡང་སྣང་མོད་དེ། །མཁས་བླུན་སུ་ཡི་དབང་དུ་བྱས། །ལུགས་གཉིས་བླང་དོར་ཤེས་འདོད་རྣམས། །དཔེ་ཡི་སོར་མོ་ཙམ་མིན་པར། །དོན་གྱི་ཟླ་ཤེལ་ལྟོས་ཤིག་དང༌། །ངོ་མཚར་རི་དྭགས་མཚན་མ་ཡོད། །འདིར་འབད་ལེགས་བྱས་ནྱ་གྲོ་དྷའི། །ས་བོན་སྨིན་པའི་དགེ་མཚན་གྱི། །ཡལ་ག་ཕྱོགས་བཅུར་རྒྱས་པ་ཡིས། །འགྲོ་བ་ཀུན་གྱི་དོན་བྱེད་ཤོག། །།ཅེས་ལེགས་པར་བཤད་པ་ཤིང་གི་བསྟན་བཅོས་ལུགས་གཉིས་ཡལ་འདབ་བརྒྱ་ལྡན་ཞིེས་བྱ་བ་འདི་ནི་མཐོང་སྣང་སྣ་ཚོགས་ཀྱིས་རྐྱེན་བྱས་ཏེ། ྋབཙུན་པ་དཀོན་མཆོག་བསྟན་པའི་སྒྲོན་མེས་ཚྭ་རྒན་སྨན་ཆུར་ཕྱིན་པའི་ལམ་ཁར་གང་དྲན་སུག་བྲིས་སུ་བགྱིས་པའོ།། །།སརྦ་མངྒ་ལཾ།
